كاين من تنكرو من أول يوم

وكاين من تتمنى عشرتو لعمر الدوم


كاين من يستاهل لمحبة

وكاين اللي يتكره بلا سبة

سلعة في سوق وحده بالخنبة (خنبة ـــ خلسة )

ولٌخرة بايرة ما ليها سوم


كاين اللي سرّو يا محلاه

ساعة فراقو تستنى ملقاه

مثل النسمة كلامو وبهاه

بُعد ساعة عنو بيوم


وكاين اللي عشرتو يا مثقلها

لجبال ولا هي محملها

مثقالو لطنان ينزلها

سيرتو من ذكر البُوم


كاين من لا ينسى ندّو

معاه كان ولا ضدّو

سال سيفو مكسر غمدو

عودو مسرج دائم ملجوم


وكاين مالحيّين ما ينعد

رقم عاليسار كمالة عدد

لرد الظلم بانيلو سد

راكب بابور الضًّيم فارح بالعوم


كاين اللي كلامو بارود

بعد الخرجة حالف ما يعود

هو هو صخر الجلمود

لا ريح يهزو لا كثرة سوم


وكاين اللي فالهف معلم

اذا وعدك اقعد ثم

غدوا عندو آمس تم

واول الشهر كي آخرو ماليه لزوم


كاين من هو عالم حكيم

في صحبتو ما تشوفش ضيم

صادق قلبو سليم

لا سيف يخشى في دينو لا لوم


وكاين اللي في الحكمة منافق

عمامة إمام والقلب الفاسق

حلال والا حرام ما عندو فارق

همو في دنيتو المعلوم


هذا وكاين من هو بين البين

تحسو فار يطلعلو جنحين

كمثل الخفاش عايش بوجهين

نهارو في غار وليلو مع الطير يحوم


كاين من تنكرو من أول يوم

وكاين من تتمنى عشرتو العمر الدوم

كاين ..............
وكاين ...........
مرسي موح ميضوع رائع

وكاين من تتمنى عشرتو العمر الدوم

لكن.................. مجرد تمني

مووووووووووح شكرا كنت مقلقة كي قريت كلماتك فرحت يسلموا اخي